Ազգային ժողովը չի ընդունել մեկուսացման նպաստ սահմանող նախագիծը
ՀՀ ազգային ժողովը երկրորդ ընթերցմամբ չի ընդունել «Իմ քայլը» խմբակցության պատգամավոր Նարեկ Զեյնալյանի հեղինակած օրենքի նախագիծը, որով, ըստ էության, առաջարկվում է սահմանել մեկուսացման նպաստ:
ՀՀ ԱԺ առողջապահության և սոցիալական հարցերի մշտական հանձնաժողովը հունիսի 4-ի արտահերթ նիստում Նարեկ Զեյնալյանի նախագահությամբ երկրորդ ընթերցմամբ քննարկել է «Ժամանակավոր անաշխատունակության եւ մայրության նպաստների մասին» օրենքում լրացումներ կատարելու մասին» օրենքի նախագիծը: Ըստ հիմնական զեկուցող Նարեկ Զեյնալյանի՝ նախագծի ընդունումը բխում է նոր կորոնավիրուսով պայմանավորված մեկուսացված եւ ինքնամեկուսացված աշխատող քաղաքացիների սոցիալական պաշտպանվածության աստիճանից եւ լրացնում է օրենսդրական բացը:
Հարակից զեկուցող ՀՀ աշխատանքի եւ սոցիալական հարցերի նախարարի տեղակալ Սմբատ Սաիյանը նախագծի կապակցությամբ արձանագրել է, որ երեկ Կառավարությունը հստակ դեմ է արտահայտվել նախաձեռնությանը: Ընդունելի համարելով նախագծի գաղափարը՝ այնուամենայնիվ Կառավարության կարծիքը մնացել է անփոփոխ՝ նկատի ունենալով նախագծի կապակցությամբ առկա ֆինանսական անորոշությունների բավականին բարձր մակարդակը:
Սմբատ Սաիյանն առաջարկել է նախագծի հեղինակին սահմանված կարգով այն վերադարձնել առաջին ընթերցման ռեժիմ՝ առաջարկությունների ներկայացման փուլ, եւ այդ ժամանակահատվածում համատեղ աշխատել, համապատասխան հաշվարկներ կատարել, ֆինանսական անորոշությունների բարձր մակարդակը որոշակիորեն զսպող կամ մեղմող մեխանիզմներ մշակել:
Նարեկ Զեյնալյանն ընդունելի է համարել Կառավարության առաջարկած տարբերակը:
Նախագիծն ստացել է դրական եզրակացություն:
