Գաղտնի փաստաթուղթ. Թուրքիան Հայաստան և Հունաստան ներխուժելու ծրագրեր է ունեցել
Իսրայելի The Jerusalem Post հեղինակավոր պարբերականը, հղում անելով Nordic Monitor-ին, գրել է, որ Թուրքիան Հայաստան և Հունաստան ներխուժելու ծրագրեր է ունեցել: Չի բացառվում, որ դրանք առնչություն են ունեցել Սիրիա ներխուժման հետ: Ըստ ամենայնի գործողությունների նման ընթացք ծրագրված է եղել չնախատեսված հանգամանքների պարագայում, որպեսզի կարողանան պահպանել հարձակվողական ու զսպող պոտենցիալը արևմտյան ճակատում զորքերի տեղաշարժման ժամանակ:
Nordic Monitor-ի հաղորդագրության համաձայն՝ խոսքը Power Point-ով սարքած «Գործողությունների պլանավորման հրահանգ» վերնագրով պրեզենտացիայի մասին է։ Այնտեղ առկա է ռազմական գործողությունների ցանկ, ու, ըստ աղբյուրի, պահպանվել է 2000 թվականի օգոստոսի 15-ով թվագրված Հայաստան ներխուժելու («Altay» օպերացիա), ինչպես նաև 2014 թվականի հունիսի 13-ով թվագրված Հունաստան ներխուժելու («Çakabey» օպերացիա) ծրագրերը։ Ըստ աղբյուրի՝ ծրագրերի մանրամասները գաղտնի են մնում ու փաստաթուղթը թերևս հաստատում է միայն այն, որ դրանք կան։
Nordic Monitor-ն ենթադրել է, որ ծրագրերն, ամենայն հավանականությամբ, թարմացվել են և վերջնական տեսքի են բերվել մի շարք նախկին ծրագրեր լրամշակելուց հետո և որ այն դեռ կարող է լինել ակտիվ:
Հունաստան ներխուժելու պլանը ստացել է «Չակա բեյ» կոդային անվանումը՝ ի պատիվ սելջուկ էմիր Չակա-բեյի, որի նավատորմը 11-րդ դարում նվաճել է Էգեյան ծովի Լեսբոս, Խիոս, Սամոս և Հռոդոս կղզիները: Հայաստան ներխուժելու պլանն անվանել են «Ալթայ»՝ ի պատիվ գեներալ Ֆահրեդին Ալթայի, որն անկախության համար մղվող թուրքական պատերազմի ժամանակ ղեկավարել է կորպուսներից մեկը:
Nordic Monitor-ը նշում է, որ Թուրքայի գլխավոր շտաբի անձնակազմը խուճապի է մատնվել գաղտնի փաստաթղթերի հնարավոր արտահոսքից և պահանջել է դատավորից թույլ տալ ստուգել փաստաթղթերը մինչև դրանք հրապարակելը, սակայն, ինչպես երևում է, դա անել չի հաջողվել:
