Վեդու ԲԿ-ն և Մարտունու ԲԿ մեկ բաժանմունք ևս կծառայեն կորոնավիրուսով հիվանդների բուժման համար
Վարչապետ Նիկոլ Փաշինյանը ֆեյսբուքի իր էջում գրել է, որ Կորոնավիրուսի դեմ պայքարի առողջապահական համակարգին մոտակա մի քանի օրերին կմիանան Սպիտակի ԲԿ-ն (100 մահճակալ), Վեդու ԲԿ-ն (100 մահճակալ) և Մարտունու ԲԿ մեկ բաժանմունք (35-40 մահճակալ): Նա հիշեցրել է, որ մինչ այժմ արդեն իսկ գործարկվել էր մոտ 2000 մահճակալ խնդիրը լուծելու համար:
- Մի կարևոր փաստ ևս. այսօր առաջին անգամ մեր նոր՝ Այրվածաքաբանության ազգային կենտրոնի բազայի վրա գործող տրիաժ կենտրոն ընդունված պացիենտներին համակարգչային տոմոգրաֆիա է արվել Ռադիոիզոտոպների արտադրության կենտրոնում (հայտնի, որպես Ֆիզիկայի ինստիտուտի ցիկլոտրոն): Ի դեպ, մոտ մեկ ամիս առաջ կառավարության նիստում առողջապահության նախարարից հետաքրքրվել էի, թե երբ կսկսի գործել պոզիտրոն-էմիսիոնային տոմոգրաֆը, որը շատ անհրաժեշտ է մեր քաղցկեղ ունեցող քաղաքացիների համար և տեղադրված է հենց այս կենտրոնում։ Ուզում եմ տեղեկացնել, որ վերջինիս վերջնական գործարկման համար անհրաժեշտ պարագաները և նյութերը անցյալ շաբաթ ներկրվել են Հայաստան և մյուս շաբաթ այն ամբողջությամբ կգործարկվի՝ երկար տարիների պարապուրդից հետո։ Մեր քաղցկեղ ունեցող պացիենտները ՊԷՏ/ՀՏ համար այլևս ստիպված չեն լինի արտասահման մեկնել,- հավելել է վարչապետը:
Առողջապահության նախարար Արսեն Թորոսյանն իր հերթին ֆեյսբուքի էջում գրել է, որ քննարկվում է Տավուշի մարզում կովիդ-կենտրոն ունենալու հարցը։
