Կարեն Անդրեասյանը մասնակցել է նոտարների մասնագիտական օրվան նվիրված միջոցառմանը

Կարեն Անդրեասյանը մասնակցել է նոտարների մասնագիտական օրվան նվիրված միջոցառմանը

Նոտարիատը Հայաստանի ամենակայացած ինստիտուտներից է․ այդ մասին են վկայում այն փաստերը, թե վերջին երկու տարիների ընթացքում որքան քիչ կարգապահական պատասխանատվության միջոցներ են կիրառվել նոտարների նկատմամբ։ Եվրոպայի նոտարների միջազգային օրվա կապակցությամբ կազմակերպված միջոցառման ժամանակ այս մասին այսօր հայտարարել է արդարադատության նախարար Կարեն Անդրեասյանը և Կառավարության ու իր անունից շնորհավորել բոլոր նոտարներին մասնագիտական օրվա առիթով։

Նախարարը շնորհակալություն է հայտնել նոտարներին, որոնք, Հայաստանի համար հատկապես դժվարին ժամանակահատվածում, ապահովել են գրագետ աշխատանք՝ ընդգծելով, որ, ի տարբերություն տարիներ առաջ ոլորտում առկա բազմաթիվ խնդիրներին, դրանք այսօր շատ չեն, իսկ եթե կան, ապա հիմնականում օրենսդրական բացերի հետևանքով են, որոնց լուծումը կտա Արդարադատության նախարարությունը՝ նոտարական համայնքի հետ համագործակցության արդյունքում։

Ներկայացնելով օրակարգային բարեփոխումները՝ նախարար Անդրեասյանն առանձնացրել է դատաիրավական համակարգում ու արդարադատության ոլորտում իրականացվելիք թվայնացման գործընթացը, որը, իր համոզմամբ, կնպաստի ու կօժանդակի նաև նոտարների աշխատանքի արդյունավետության բարձրացմանը։

Եվս մեկ անգամ շնորհավորելով նոտարներին մասնագիտական օրվա կապակցությամբ՝ նախարարը մաղթել է արդյունավետ աշխատանք՝ ի շահ քաղաքացիների բարեկեցության։

Նոտարական պալատի նախագահ Լիլիթ Մուրադյանն իր ելույթում անդրադարձել է նոտարների պատասխանատու աշխատանքին և ընդգծել, որ քաղաքացու օրինական շահերի պաշտպանությանն ուղղված աշխատանք կատարելով՝ նոտարը նպաստում է արդարադատության իրականացմանն ու դատարանների ծանրաբեռնվածության թեթևացմանը։

Բացման և ողջույնի խոսքին հաջոդել է նորանշանակ վեց նոտարների երդման  ու վաստակաշատ նոտարների պարգևատրման արարողությունը։

Արդարադատության նախարար Կարեն Անդրեասյանն իր արդար դատելու ունակությունը 5 բալանոց համակարգով գնահատում է 4 միավոր։ Ճեպազրույցի ընթացքում լրագրողի հարցին ի պատասխան հայտարարել է նախարարը:

Լրագրողը հետաքրքրվել էր, թե «ի՞նչ գնահատական կտաք Ձեր արդար դատելու ունակությանը` հաշվի առնելով, որ Դուք նաև Մարդու իրավունքների պաշտպան եք աշխատել»։

«Ես կարծում` 5 չկա։ Ոչ ոք իդեալական չէ, և բոլորս էլ ունենք որոշակի սուբյեկտիվ դրսևորումներ։ Բայց ես ինձ 4 բալ կնշանակեի իմ արդար դատելու կարողության մեջ», — պատասխանեց Կարեն Անդրեասյանը։

Արդարադատության նախարարը փոխնախարար Սուրեն Գրիգորյանի հետ միասին մասնակցում էր ՀՀ նոտարական պալատի անդամների արտահերթ ժողովին։

wp-apeth