Քննարկվեցին խորհրդարանում հավատարմագրված լրագրողների տեղաշարժի կանոնակարգմանը վերաբերող հարցեր

Քննարկվեցին խորհրդարանում հավատարմագրված լրագրողների տեղաշարժի կանոնակարգմանը վերաբերող հարցեր

ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ օգոստոսի 30-ին Ազգային ժողովում հավատարմագրված ԶԼՄ ներկայացուցիչների, ԶԼՄ-ների ղեկավարների, լրագրողական կազմակերպությունների մասնակցությամբ կայացավ աշխատանքային քննարկում, որին մասնակցեցին նաեւ ԱԺ պատգամավորներ:

Աշխատանքային հանդիպման նպատակն էր վեր հանել ՀՀ Ազգային ժողովի խորհրդի 2017 թվականի դեկտեմբերի 27-ի` «ՀՀ Ազգային ժողովում լրագրողների հավատարմագրման կարգը հաստատելու մասին» որոշմամբ հաստատված հավելվածում փոփոխություններ եւ լրացումներ կատարելու մասին» ԱԺ խորհրդի (2021 թվականի օգոստոսի 18-ի ԱԺԽՈ-001-Լ) որոշման խնդրահարույց դրույթները:

Հանձնաժողովի նախագահ Թագուհի Թովմասյանը նշեց, որ այսօրվա հանդիպումը նախաձեռնել է` հաշվի առնելով իր հրապարակային խոստումը` հանձնաժողովի նախագահի պաշտոնում ընտրվելու դեպքում առաջին քայլերից մեկը լինելու է Ազգային ժողովում հավատարմագրված լրագրողների տեղաշարժի հարցը: Նրա խոսքով` ավանդույթի ուժով լրագրողները պետք է խորհրդարանում ազատ տեղաշարժվեն, իրականացնեն իրենց մասնագիտական գործունեությունը:

Թագուհի Թովմասյանի գնահատմամբ` անհրաժեշտ է քննարկել եւ հասկանալ լրագրողների տեղաշարժի ռիսկերը եւ վտանգավորության շեմը: Հանձնաժողովի նախագահն ընդգծեց, որ հանդիպման նպատակն է նաեւ լսել լրագրողներին, քանի որ լրագրողներին վերաբերող որոշումները ընդունվել են առանց լրագրողական հանրույթին լսելու: Նրա կարծիքով` ԱԺ խորհրդի որոշումը հակասում է «Զանգվածային լրատվության մասին» օրենքի դրույթներին:

Լրագրողների «Ասպարեզ» ակումբի տնօրեն Լեւոն Բարսեղյանը կարծիք հայտնեց, որ լրագրողների գործունեության սահմանափակումը պետք է լինի ողջամիտ հիմնավորմամբ, իսկ որեւէ սահմանափակում չի կարող լինել կամայական անգամ այն դեպքում, երբ օրենքներով կամ նորմատիվ ակտերով է կանոնակարգվում: «Հակառակ դեպքում դրանք որակվելու են որպես բռնություն խոսքի եւ արտահայտման ազատության դեմ»,-ասաց Լեւոն Բարսեղյանը:

Հայաստանի ժուռնալիստների միության նախագահ Սաթիկ Սեյրանյանը լրատվամիջոցների ներկայացուցիչներին միավորվելու եւ համատեղ գործելու կոչ արեց: Ըստ նրա` հավատարմագրման գործող կարգը բավականին արդյունավետ էր:

Ինֆորմացիայի ազատության կենտրոնի տնօրեն Շուշան Դոյդոյանը խորհրդարանում լրագրողների գործունեությանն առնչվող մի քանի առաջարկներ է ներկայացրել: Ըստ նրա` հավատարմագրված լրագրողների տեղաշարժը չի կարող սահմանափակվել խորհրդարանում, սակայն բացառիկ դեպքերում կան խնդիրներ` կապված լրագրողների ոչ էթիկական պահվածքի հետ: Հենց այս խնդիրը հաշվի առնելով` վերջինս առաջարկում է ՀՀ Ազգային ժողովում լրագրողի հավատարմագրման համար սահմանել առնվազն երկու տարվա մասնագիտական աշխատանքային փորձի պահանջ, հավատարմագրել միայն այն լրատվամիջոցների լրագրողներին, որոնք ընդունել են մասնագիտական վարքագծի կանոնագիր:

ԶԼՄ ներկայացուցիչները բարձրաձայնեցին ԱԺ խորհրդի որոշման` իրենց գործունեությունը խոչընդոտող դրույթների մասին, ինչը, նրանց գնահատմամբ, հարիր չէ ժողովրդավարական երկրին: Անդրադարձ եղավ ԱԺ խորհրդի որոշման իրավաչափությանը: Կարեւորվեց լրագրողների կողմից հստակ առաջարկների ներկայացումն ԱԺ ղեկավարությանը: Առաջարկվեց բողոքի ակցիաներ իրականացնել, հանդիպել ՀՀ մարդու իրավունքների պաշտպանի հետ, իրավական գործընթացներ սկսել: Քննարկվեց նաեւ իրավապաշտպաններին եւ միջազգային կառույցներին դիմելու հարցը:

Ամփոփելով աշխատանքային քննարկումը` Թագուհի Թովմասյանն ընդգծեց` պետք է չեղարկվեն լրագրողների տեղաշարժման բոլոր սահմանափակումները: Հանձնաժողովի նախագահի գնահատմամբ` այս հանդիպումը եւս բողոքի ձայն էր: Նշվեց, որ ամփոփ արձանագրություն կկազմվի հնչած պահանջների եւ առաջարկների վերաբերյալ:

wp-apeth