«Շիրակ» ՄԱ . «Մի քանի նկատառում ՀՖՖ գործունեության/անգործության վերաբերյալ»

Գյումրու «Շիրակի» մամուլի ծառայությունը հայտարարություն է տարածել ֆեյսբուքի էջում: Հաղորդագրության համաձայն՝ ներկայացված նկատառումները հիմնավոր կասկած են առաջացնում, որ ՀՖՖ ներկայիս ղեկավարները հատուկ «ջերմ» վերաբերմունք ունեն «Շիրակ» ֆուտբոլային ակումբի և ընդհանուր առմամբ՝ Գյումրի քաղաքի նկատմամբ: Հայտարարությունը ներկայացնում ենք առանց խմբագրման:

«Մի քանի նկատառում ՀՖՖ գործունեության/անգործության վերաբերյալ

• 1. ՀՖՖ նախագահ Արմեն Մելիքբեկյանը ՀՖՖ ղեկավարության երկու տարիների ընթացքում չի այցելել Գյումրու ֆուտբոլի ակադեմիա, որտեղ մարզվում են Հայաստանի լավագույն ակադեմիաներից մեկի սաները:
• 2. ՀՖՖ տեխնիկական տնօրեն Խինես Մելենդեսը, ով պատասխանատու է մանկապատանեկան նոր ծրագրի ադապտացմանը Հայաստանում, երբեք չի համեցել Գյումրի քաղաք՝ հետևելու, թե «Շիրակի» մարզիչները և սաները ինչպես են իրագործում իրենց մանկապատանեկան զարգացման ծրագիրը: Այս ընթացքում միայն մեկ անգամ Գյումրու ֆուտբոլի ակադեմիա է այցելել Խինես Մելենդեսի փեսա Ռուբեն Լեսկանոն: Ու այս ամենը այն դեպքում, երբ «Շիրակը» միակն էր Հայաստանի Բարձրագույն խմբի ակումբներից, որ մեծ սիրով ընդունեց իրանց կողմից ներկայացված ծրագիրը և սկսեց աշխատել իրենց կողմից ներկայացված մոդելով:

• 3. Հայաստանի ազգային հավաքականի գլխավոր մարզիչ Խոակին Կապառոսը երբեք չի այցելել Գյումրի և ներկա չի գտնվել Հայաստանի Բարձրագույն խմբում ամենաշատ հայ ֆուտբոլիստներով (այլ խոսքով ասած՝ Հայաստանի ազգային հավաքականի հնարավոր թեկնածուներով) հանդես եկող «Շիրակի» տնային հանդիպումներին:

• 4. Հայաստանի մանկապատանեկան առաջնությունների 2019-20 թթ մրցաշրջանում տարբեր տարիքային խմբերի միջին արդյունքներով լավագույնն են հենց «Շիրակ» ՖԱ-ի մանկապատանեկան թիմերը, սակայն «Շիրակի» մանկապատանեկան մարզիչները ընդգրկված չեն և ոչ մի Հայաստանի մանկապատանեկան հավաքականներում նույնիսկ՝ որպես երրորդ մարզիչ:

• 5. Գյումրու քաղաքային մարզադաշտը Հայաստանի գրեթե միակ մարզադաշտն է, որի հիմնովին վերանորոգումները իրականացվել են Ակումբի և Ակումբի նախագահի միջոցներով, և ՀՖՖ-ն չի ցուցաբերել և ոչ մի աջակցություն. մի մարզադաշտի, որը կարող է ծառայել որպես Հայաստանի հավաքականների պահեստային և հիմնական մարզադաշտ:

• 6. 2019 թվականին Գյումրու քաղաքային մարզադաշտում 16 տարվա ընդմիջումից հետո առաջին անգամ Հայաստանի երիտասարդական հավաքականը հանդիպում անցկացրեց Գյումրու քաղաքային մարզադաշտում, որին ներկա էին գրեթե երեք հազար երկրպագու: Իսկ թիմը տոնելով ենթախմբում առաջին հաղթանակը՝ այդ օրը իսկական տոն պարգևեց Գյումրի քաղաքին: Սակայն հաջորդ իսկ տնային հանդիպումը երիտասարդական հավաքականը անցկացրեց Երևանում, որին ներկա էին մոտ 150-200 երկրպագու: Իսկ 2020 թվականի համար բանավոր խոսքում «Շիրակին» հայտնել են, որ ոչ մի հանդիպում չի նախատեսվում անցկացնել Գյումրիում: Ի դեպ նշենք, որ այդ հանդիպումները Գյումրիում անցկացնելիս Ակումբը չի ունենում և ոչ մի ֆինանսական օգուտ:

• 7. «Շիրակը», ունենալով Հայաստանի լավագույն ակադեմիաներից մեկը և անընդհատ հանդես գալով բավականին թվով հայ ֆուտբոլիստներով, այսօրվա դրությամբ «Շիրակից» Հայաստանի ազգային հավաքական է հրավիրվում Նիգերիացի ֆուտբոլիստ:

• 8. ՀՖՖ գործկոմում ընդգրկված չէ Գյումրի քաղաքից որևէ ներկայացուցիչ:

9. ՀՖՖ ներքին գործունեությանը (օրինակ՝ կոմիտեներում) «Շիրակ» ՖԱ-ից ոչ մի աշխատակից ընդգրկված չէ:

Այս ամենը հիմնավոր կասկած է առաջացնում, որ ՀՖՖ ներկայիս ղեկավարները հատուկ «ջերմ» վերաբերմունք ունեն «Շիրակ» ֆուտբոլային ակումբի և ընդհանուր առմամբ՝ Գյումրի քաղաքի նկատմամբ»,- նշված է հայտարարությունում:

Հիշեցնենք, որ ՀՖՖ Մրցավարական բաժնի փորձագետները մեկնաբանել էին հուլիսի 6-ին կայացած «Նոա»-«Շիրակ» հանդիպման վիճելի դրվագները: Իր հերթին հայտարարությամբ էր հանդես եկել նաև «Շիրակը», իսկ ավելի ուշ վիճելի դրվագների հետ կապված իր դիրքորոշումն է հայտնել: