Երեք օրով կասեցվել է մեկ մանկապարտեզի գործունեություն
ՀՀ կրթության տեսչական մարմնի ստուգայցերի արդյունքում արձանագրված խախտումների հիման վրա` ՀՀ պարետի N135-Ա որոշմամբ, այսօր 3 օրով կասեցվել է Երևանի Մալաթիա-Սեբաստիա վարչական շրջանի թիվ 85 մանկապարտեզի գործունեությունը:
Տեսչական մարմինը այսօր նաև կրկնակի ստուգայցեր է իրականացրել Երևանի Մալաթիա-Սեբաստիա վարչական շրջանում: Ուշադրության կենտրոնում այն մանկապարտեզներն են, որտեղ նախորդ այցերի ընթացքում արձանագրվել էին սանիտարահիգիենիկ կանոնների պահպանման թերացումներ:
Մշտադիտարկման արդյունքում արձանագրվել է, որ թերացումների մեծ մասը արդեն վերացված են: ՀՀ կրթության տեսչական մարմինը շարունակում է ամենօրյա ստուգայցերը մայրաքաղաքի նախադպրոցական ուսումնական հաստատություններ, իսկ արձանագրված խախտումները ներկայացվում են պարետատուն:
Ուժեղացված վերահսկողական գործառույթներ են իրականացվել Մալաթիա-Սեբաստիա վարչական շրջանում․ ՔՏՀԱ տեսչական մարմինը հայտնաբերել է խախտումներ
Հունիսի 15-ին ՀՀ քաղաքաշինության, տեխնիկական և հրդեհային անվտանգության տեսչական մարմնի մասնագետները ՀՀ ոստիկանության ծառայության հետ համատեղ կրկին ուժեղացված հսկողություն և մշտադիտարկումներ են իրականացրել Մալաթիա Սեբաստիա վարչական շրջանում։
Վերահսկողությունը վարչական շրջանում իրականացվել է ինչպես շրջիկ խմբերի միջոցով, այնպես էլ կանգառի կետերում՝ Տեսչական մարմնի մասնագետների և Ոստիկնության ծառայողների հետ համատեղ։
Վաղ առավոտից մեկնարկած մշտադիտարկման արդյունքում հայտնաբերվել են ՀՀ պարետի կողմից սահմանած անվտանգության կանոնների մի շարք խախտումներ ու թերացումներ, որոնք բնույթով գրեթե նույն խախտումներն են, ինչ նախորդ օրերին է արձանագրվել։ Մասնավորապես` միկրոավտոբուսի առջևի նստատեղին միաժամանակ երկու ուղևորի նստեցում, առանց ձեռնոցի վարորդ, ախտահանիչ հեղուկի բացակայություն, գերբեռնված փոխադրում։ Տաքսի ավտոմոբիլներով ուղևորափոխադրում իրականացնողների դեպքում՝ վարորդի կողքին ուղևորի նստեցում, առանց դիմակի ուղևոր, առանց դիմակի և առանց ձեռնոցի վարորդ։
Վերոնշյալ բոլոր խախտումների հիմքով կազմվել են համապատասխան վարչական արձանագրություններ։
Խախտումները բացառելու կամ հնարավորինս նվազագույնին հասցնելու նպատակով ՔՏՀԱՏՄ մասնագետների կողմից իրականացվել են ակտիվ իրազեկման և բացատրական աշխատանքներ, վարորդներին և ուղևորներին տրվել պարտադիր կատարման ցուցումներ՝ թերություններն անհապաղ շտկելու և վերացնելու ուղղությամբ։
Տեսչական մարմնի մասնագետների կողմից ամենօրյա խիստ մշտադիտարկումներ և վերահսկողական աշխատանքներն են իրականացվում ինչպես մայրաքաղաքում, այնպես էլ բոլոր մարզերում:
