Համահայկական ամառային 8-րդ խաղերի բացման պաշտոնական արարողությունը տեղի կունենա Գյումրիում
«Միասնություն սպորտով» կարգախոսով, տոնական տրամադրությամբ ու ամենայն պատասխանատվությամբ․ Համահայկական ամառային 8-րդ խաղերի բացման պաշտոնական արարողությունը տեղի կունենա Գյումրիում։
Շիրակի մարզպետ Մուշեղ Մուրադյանը Գյումրի համայնքի ղեկավարի, մարզային ու քաղաքային իշխանությունների ներկայացուցիչների հետ հյուրընկալել է Համահայկական խաղերի համաշխարհային կոմիտեի նախագահ Իշխան Զաքարյանին, Հանրային հեռուստաընկերության գլխավոր պրոդյուսեր Տիգրան Վիրաբյանին, կոմիտեի ներկայացուցիչներին։ Աշխատանքային քննարկման ժամանակ անդրադարձ է կատարվել համահայկական ամառային 8-րդ խաղերի նախապատրաստական ու կազմակերպչական աշխատանքներին։
«Մեզ համար պատիվ է, որ համահայկական ամառային 8-րդ խաղերի մեկնարկը կտրվի Գյումրուց և մարզկենտրոնում կկայանա խաղերի բացման հանդիսավոր արարողությունը։ Պատիվ ու մեծ պատասխանատվություն է, որը մեզ պարտավորեցնում է համատեղելու բոլորիս ջանքերն ու անելու ամեն հնարավորը օգոստոսի 5-ը տոնական դարձնելու, Շիրակ այցելած հյուրերին հավուր պատշաճի դիմավորելու համար։ Վստահ եմ՝ համատեղ ու փոխկապակցված աշխատանքի արդյունքում համահայկական ամառային 8-րդ խաղերին նոր շունչ կհաղորդվի, խաղերը կվերածվեն սպորտային մեծ տոնի՝ նպաստելով Հայաստան-սփյուռք կապերի ամրապնդմանը»,- նշել է Շիրակի մարզպետը։
Համահայկական խաղերի համաշխարհային կոմիտեի նախագահ Իշխան Զաքարյանը ներկայացրել է խաղերի անցկացման կազմակերպչական ծրագրերը, առաջիկա անելիքները։ Նշվել է, որ մինչև հունիսի 1-ը մարզպետարաններում պետք է ձևավորվեն համայնքային թիմեր։ Անդրադարձ է կատարվել ինչպես շքերթին մասնակցող քաղաքային թիմերի համապատասխան հանդերձանքի ապահովմանը, տեղափոխմանն ու գիշերակացի և սնունդի հետ կապված խնդիրների լուծմանն առնչվող հարցերի, այնպես էլ մարզադահլիճների գույքագրման գործընթացին։ Նախնական պայմանավորվածություն է ձեռք բերվել, թե որ մարզաձևերի մրցումները կանցկացվեն Շիրակի մարզում։
Նշենք, որ համահայկական ամառային 8-րդ խաղերը կանցկացվեն 2023 թ-ի օգոստոսի 5-19-ը, 17 մարզաձևերի համար խաղարկվելու է 107 հավաքածու մեդալ:
