Շիրակի մարզում կորոնաթվերը նվազում են
Շիրակի մարզում վերջին շրջանում նկատվում է կորոնավիրուսային հիվանդության դեպքերի նվազում: Ինչպես տեղեկացնում է «Արմենպրեսը» մարզում ոչ միայն ստացիոնար, այլ նաև ամբուլատոր բուժում ստացողների թիվն է նվազել:
Շիրակի մարզպետարանի առողջապահության և սոցիալական ապահովության վարչության պետի պարտականությունները կատարող Լեյլի Ասլանյանը «Արմենպրեսին» տեղեկացրել է, որ նոյեմբերի 30-ի դրությամբ մարզում 170 մահճակալից զբաղեցված է 86-ը՝ ծանրաբեռնվածությունը 50 տոկոս է, իսկ ամբուլատոր հսկողության տակ է 228 անձ՝ այստեղ ևս նվազում կա:
«Ընդհանուր իրավիճակը կայուն է: Ունենք թվերի նվազում: Բնականաբար, այստեղ իր դրական ազդեցությունն ունեն պատվաստումները: Այս պահի դրությամբ, առաջին դեղաչափով պատվաստված է մարզի 18 տարեկանից բարձր ազգաբնակչության 33.3 տոկոսը»,- նշել է Լեյլի Ասլանյանը՝ ավելացնելով, որ մարզում շարունակում են գործել նաև պատվաստումներ իրականացնող շարժական խմբերը:
