Գրիգորյանը՝ ամսվա լավագույն ֆուտբոլիստ, Գունկոն՝ լավագույն մարզիչ
Հայտնի են Vbet Հայաստանի Պրեմիեր լիգայի 2021/22 մրցաշրջանի օգոստոս ամսվա լավագույն մարզիչն ու ֆուտբոլիստը։
Փորձագետների եւ երկրպագուների քվեարկությամբ հոբելյանական մրցաշրջանի օգոստոս ամսվա լավագույն ֆուտբոլիստ է ճանաչվել «Ուրարտուի» կիսապաշտպան Նարեկ Գրիգորյան: Վերջինս անցկացրած 4 խաղում դարձել է 3 գոլի հեղինակ՝ օգնելով իր թիմին տանել նույնքան հաղթանակ։ Գրիգորյանը կարողացել է առաջ անցնել «Սեւանի» հարձակվող Անդրե Մենսալաոյից և «Արարատ-Արմենիայի» հարձակվող Յուսուֆ Օտուբանջոյից:
Ամսվա լավագույն մարզչի պայքարում հաղթել է «Արարատ-Արմենիայի» գլխավոր մարզիչ Դմիտրի Գունկոն, ում գլխավորությամբ երեւանյան ակումբը 5 խաղում տարել է 5 հաղթանակ։ Մասնագետը բացարձակ առաջատարն է եղել փորձագետների գնահատմամբ, իսկ 2-րդը՝ երկրպագուների քվեարկությամբ։ Գունկոյին հաջորդել են «Սեւանի» գլխավոր մարզիչ Պամբոս Քրիստոդուլուն և «Արարատի» գլխավոր մարզիչ Վարդան Բիչախչյանը ։
Հիշեցնենք, որ Դմիտրի Գունկոն այս անվանակարգում հաղթող է ճանաչվում 2-րդ անգամ․ մասնագետը լավագույն էր Vbet Հայաստանի Պրեմիեր լիգայի նախորդ մրցաշրջանի ապրիլ ամսին, երբ դեռ գլխավորում էր Երեւանի «Նոան»։
Լավագույնները որոշվել են երկրպագուների եւ փորձագետների ձայների հանրագումարում՝ համապատասխանաբար 1/3 եւ 2/3 համամասնությամբ: Լավագույն մարզչի եւ ֆուտբոլիստի մրցանակները կհանձնվեն Vbet Հայաստանի Պրեմիեր լիգայի մրցանակակիրների թիմերի առաջիկա տնային հանդիպումներից առաջ: Vbet ընկերության կողմից մրցանակներ սահմանված են յուրաքանչյուր ամսվա համար:
