Եվրոպական ինտեգրման հարցերի մշտական հանձնաժողովի նախագահի պաշտոնում առաջադրվեց Արման Եղոյանի թեկնածությունը
Օգոստոսի 12-ին շարունակվեց ԱԺ ութերորդ գումարման առաջին նստաշրջանի աշխատանքը: ԱԺ «Քաղաքացիական պայմանագիր» խմբակցությունը Եվրոպական ինտեգրման հարցերի մշտական հանձնաժողովի նախագահի պաշտոնում առաջադրեց Արման Եղոյանի թեկնածությունը:
Թեկնածուի մասնագիտական որակները, նրա կենսագրությունն ու աշխատանքային ուղին ներկայացրեց «Քաղաքացիական պայմանագիր» խմբակցության պատգամավոր Սոնա Ղազարյանը: Արման Եղոյանը մասնագիտությամբ իրավաբան է, պատմաբան եւ եվրոպագետ: Նշենք, որ վերջինս յոթերորդ գումարման Ազգային ժողովում նույնպես ղեկավարել է Եվրոպական ինտեգրման հարցերի մշտական հանձնաժողովը:
Իր ելույթում Արման Եղոյանը շնորհակալություն հայտնեց «Քաղաքացիական պայմանագիր» խմբակցությանը իր թեկնածությունն առաջադրելու համար, անդրադարձավ հանձնաժողովի ծավալած գործունեությանն ու նրա գործառույթներին: Նա պարզաբանեց, որ 2007-ից ստեղծված այս հանձնաժողովը որոշակիորեն տարբերվում է ԱԺ մյուս մշտական հանձնաժողովներից, քանի որ այստեղ քիչ են քննարկվում օրենսդրական նախաձեռնություններ: «Առավելապես ունենալով ներկայացուցչական բնույթ՝ այս հանձնաժողովի հիմնական գործառույթը Հայաստանի Հանրապետության եւ Եվրամիության օրենսդրությունների մոտարկումն ու ՀՀ-ԵՄ համաձայնագրի կիրարկման նկատմամբ վերահսկողությունն է»,-պարզաբանեց թեկնածուն: Այս համատեքստում Արման Եղոյանն անդրադարձավ նաեւ Եվրամիության կողմից Հայաստանին հատկացվելիք 2.6 մլրդ եվրո գումարին՝ նշելով, որ կառույցի կողմից նման մեծ գումար հատկացնելու որոշումը պայմանավորված է անցկացված խորհրդարանական արտահերթ ընտրությունների որակով:
