Սննդի շղթայում ներգրավված 7 տնտեսավարողի մոտ խախտումներ են արձանագրվել
ԱՀ ԷԳՆ սննդամթերքի անվտանգության, շուկայի և սպառողների շահերի պաշտպանության պետական ծառայության կողմից հուլիսի 26-ից 30-ն ընկած ժամանակահատվածում իրականացված դիտարկումների արդյունքում 7 տնտեսավարող սուբյեկտների մոտ խախտումներ են արձանագրվել: Այս մասին «Արցախպրեսին» հաղորդել են ԱՀ Էկոնոմիկայի և գյուղատնտեսության նախարարությունից:
«Դիտարկումների արդյունքում՝ սննդի շղթայում ներգրավված անձանց ԱՀ օրենսդրությամբ ներկայացվող պահանջների համապատասխանության խախտումներ են արձանագրվել 7 տնտեսավարող սուբյեկտների մոտ:
Դրանց վերացման վերաբերյալ տրվել են հանձնարարականներ և սահմանվել ժամկետներ: Իրականացվել է 5 ուսումնամեթոդական շրջայց՝ 83 տնտեսավարող սուբյեկտների մոտ, կատարվել՝ 5 շրջիկ առևտրով զբաղվող և 3 ժամանակավոր վաճառակետերի տնտեսավարող սուբյեկտների հաշվառում»,- մեզ հետ զրույցում ասաց ԱՀ Էկոնոմիկայի և գյուղատնտեսության նախարարության մամուլի պատասխանատու Գոհար Հայրապետյանը:
Մեր զրուցակցի տեղեկացմամբ՝ վերահսկողական աշխատանքների ընթացքում իրականացվել են նաև միրգ-բանջարեղենում առկա նիտրատների առավելագույն մնացորդային քանակների ստուգումներ:
«Ընդհանուր չափվել են 4590 կգ միրգ-բանջարեղենում նիտրատների առավելագույն մնացորդային քանակները, այդ թվում՝ կարտոֆիլ՝ 450 կգ, լոլիկ՝ 400 կգ, վարունգ՝ 140 կգ, ձմերուկ՝ 3255 կգ, սեխ՝ 305 կգ և գլուխ սոխ՝ 40 կգ: Միրգ-բանջարեղենում առկա նիտրատների քանակները համապատասխանել են կառավարության կողմից սահմանված նորմերին»,- ընդգծել է Գ. Հայրապետյանը:
