Հիփոթեքային վարկին ուղղվող եկամտային հարկի վերադարձի համակարգը Երևանում աստիճանաբար կհանվի
Հոկտեմբերի 5-ին Ազգային ժողովի հերթական նիստում առաջին ընթերցմամբ քննարկվել է Կառավարության հեղինակած «ՀՀ հարկային օրենսգրքում լրացում կատարելու մասին» օրենքի նախագիծը:
Հիմնական զեկուցող, ՀՀ ֆինանսների նախարարի տեղակալ Արման Պողոսյանի ներկայացրել է, որ նախագիծը նպատակ ունի փոխելու հիփոթեքային վարկի սպասարկման համար վճարված տոկոսագումարների չափով եկամտային հարկի վերադարձի արտոնության ուղղվածությունը եւ դրան հաղորդելու տարածքային համաչափ զարգացման նշանակություն: Նախագծի ընդունմամբ կարգավորմանը կտրվի ավելի ընդգծված սոցիալական նշանակություն:
Արման Պողոսյանը մանրամասն ներկայացրել է առաջարկվող փոփոխությունները Երեւան քաղաքի 4 գոտիներում: Նշվել է, որ ներդրողների շահերը պաշտպանելու նպատակով առաջարկվել է սահմանված արտոնությունները կիրառել այն կառուցապատումների նկատմամբ, որոնց շինարարության թույլտվությունները ստացված կլինեն մինչեւ 2022 թվականի հունվարի 1-ը:
Նա նշեց, որ շարունակվում է այդ համակարգին սոցիալականություն հաղորդելու քաղաքականությունը և տարածքային համաչափ զարգացման քաղաքականությունը:
«Եվ, ըստ այդմ, առաջարկվում է ամրագրել, որ համակարգից օգտվելու համար, երբ գույքը ձեռք է բերվում կամ նախատեսվում է կառուցել Երևանի առաջին գոտում, անհրաժեշտ է, հիփոթեքային վարկը ստացված լինի մինչև 2022 թվականի հուլիսի 1-ը, նույն տրամաբանությամբ երկրորդ գոտու համար ՝ մինչև 2023 թվականի հունվարի 1-ը, երրորդ գոտու համար անհրաժեշտ պայման է սահմանվում, որ վարկը պետք է ստացված լինի մինչև 2023-ի հուլիսի 1-ը: Այնուհետև, 1.5 տարի դադար է առաջարկվում: Իսկ Երևան քաղաքի մնացյալ գոտիների համար նախապայման է առաջադրվում, որ հիփոթեքային վարկը ստացված լինի մինչև 2025-ի հունվարի 1-ը»,-ասաց Պողոսյանը:
Զուգահեռաբար, որպեսզի ընթացքում գտնվող շինարարական նախագծերի շարունակականությունն ապահովվի, առաջարկվում է կարգավորել նաև անցումային հարաբերությունները, որ եթե շինարարության թույլտվությունը ստացված կլինի մինչև 2022-ի հունվարի 1-ը, ապա դրա շրջանակում կառուցված շենքից բնակարանների վաճառքի գործարքներն ամբողջությամբ կսպասարկվեն եկամտային հարկի վերադարձի համակարգի շրջանակներում՝ առանց սահմանափակումների:
Զեկուցողը պատասխանել է համակարգում առկա արհեստական պահանջարկին եւ գնաճին, տարածքների համաչափ զարգացմանը վերաբերող հարցերին:
Հարակից զեկուցող, ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանի գնահատմամբ՝ առաջարկվող փոփոխությունները հավասրակշռված, ցնցումներից զերծ պահող եւ կանխատեսելիություն ապահովող լուծումներ են: Նախագիծը հանձնաժողովում ստացել է դրական եզրակացություն:
Ելույթներում պատգամավորներն անդրադարձել են ծրագրի սոցիալական բաղադրիչին, Հայաստանի շրջաններում բնակարանաշինության զարգացման հեռանկարներին:
Վահե Հակոբյանը տեղեկացրել է, որ ԱԺ «Հայաստան» խմբակցությունը դեմ է քվեարկելու նախագծի այս տարբերակին: Առաջինից երկրորդ ընթերցում ընկած ժամանակահատվածում խմբակցությունը կներկայացնի առաջարկություններ:
Եզրափակիչ ելույթում Բաբկեն Թունյանն ընդգծել է, որ նախագծով առաջարկվող փոփոխությունների նպատակը շինարարության համակարգի վերականգնումն է:
ՀՀ ֆինանսների նախարարի տեղակալ Արման Պողոսյանը եզրափակիչ ելույթում պատասխանել է հնչեցված դիտարկումներին:
