«Հայաստան» խմբակցությունը ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահի պաշտոնում առաջադրեց Արմեն Գեւորգյանի թեկնածությունը
ՀՀ Ազգային ժողովը օգոստոսի 11-ին շարունակեց ԱԺ ութերորդ գումարման առաջին նստաշրջանի աշխատանքը՝ շարունակելով մշտական հանձնաժողովների նախագահների ընտրության վերաբերյալ քննարկումները:
ԱԺ «Հայաստան» խմբակցության պատգամավոր Արմեն Ռուստամյանը ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահի պաշտոնում ընտրելու համար առաջադրեց «Հայաստան» խմբակցության պատգամավոր Արմեն Գեւորգյանի թեկնածությունը: Արմեն Ռուստամյանը ներկայացրեց գործընկերոջ կենսագրությունն ու աշխատանքային ուղին:
«Այս հանձնաժողովը շատ կարեւոր դերակատարություն ունի տարածաշրջանային խնդիրները եւ մարտահրավերները ճիշտ գնահատելու տեսանկյունից»,-տարածաշրջանային խնդիրներին անդրադառնալով՝ ասաց ընդդիմության ներկայացուցիչը:
Արմեն Գեւորգյանն իր ելույթում անդրադարձավ ԱԺ մշտական հանձնաժողովների կարեւորությանը, հանձնաժողովի գործառույթներին, այդ պատասխանատու պաշտոնում ընտրվելու դեպքում աշխատանքի իր պատկերացումներին եւ անելիքներին: Պատգամավորն անդրադարձավ նաեւ տարածաշրջանային խնդիրներին, տարածաշրջանային երկրների հետ էներգետիկ համագործակցությանը, արտաքին հարաբերությունների օրակարգային հարցերին եւ այլն: «Տարածաշրջանային եւ եվրասիական ինտեգրման հարցերի մշտական հանձնաժողովի գործունեությունը բավականին կարեւոր է եւ կարող է իր էությամբ, աշխատանքի ոճով եւ մեխանիզմներով նպաստել տարածաշրջանում համագործակցության նոր օրակարգի ձեւավորմանը, եվրասիական երկրների հետ կապերի ակտիվացմանը եւ մեր պետական, ազգային շահերի հետեւողական պաշտպանությանն ու խորհրդարանական դիվանագիտության ակտիվացմանը»,-ամփոփելով խոսքը՝ ընդգծեց նա: