Լևոն Բաբուջյանը և Արփինե Գրիգորյանը՝ շախմատի Հայաստանի առաջին խմբի առաջնության հաղթողներ

Լևոն Բաբուջյանը և Արփինե Գրիգորյանը՝ շախմատի Հայաստանի առաջին խմբի առաջնության հաղթողներ

Շուրջ երկու շաբաթ տևած պայքարից հետո Տիգրան Պետրոսյանի անվան շախմատի տանն ավարտվել են շախմատի Հայաստանի տղամարդկանց և կանանց առաջին խմբի առաջնությունները: Տղամարդկանց մրցաշարին մասնակցել է 14 շախմատիստ, այդ թվում՝ 5 գրոսմայստեր և 5 միջազգային վարպետ, իսկ կանանց մրցաշարում պայքարն ընթացել է 10 շախմատիստուհու միջև:

Կանանց առաջին խմբի 76-րդ առաջնությունում լավագույն արդյունքը գրանցել է Արփինե Գրիգորյանը՝ 9 հնարավորից վաստակելով 8 միավոր: Երկրորդ հորիզոնականը զբաղեցրել է Աստղիկ Հակոբյանը` վաստակելով 7 միավոր, իսկ լավագույն եռյակը 6 միավորով եզրափակել է Նարե Առաքելյանը:

Տղամարդկանց առաջին խմբի 81-րդ առաջնության չեմպիոն է դարձել գրոսմայստեր Լևոն Բաբուջյանը, որը 13 հնարավորից վաստակել է 9 միավոր: 8.5 միավորով 2-րդ հորիզոնականը զբաղեցրել է գրոսմայստեր Տիգրան Հարությունյանը, իսկ Մամիկոն Ղարիբյանը 8 միավորով եզրափակել է լավագույն եռյակը։ Մրցանակակիր շախմատիստները նվաճել են բարձրագույն խմբի ուղեգրեր։

Հավելենք, որ Բարձրագույն խմբի առաջնությունները մեկնարկելու են փետրվարի 15-ին: Կանանց բարձրագույն խմբի առաջնությանը կմասնակցեն Մարիա Գևորգյանը, Սիրանուշ Ղուկասյանը, Սուսաննա Գաբոյանը, Մարիամ Մկրտչյանը, Արփինե Գրիգորյանը, Աստղիկ Հակոբյանը, Նարե Առաքելյանը, Աննա Խաչատրյանը, Վերոնիկա Խաչատրյանը և Մարիամ Ավետիսյանը, իսկ տղամարդկանց մրցաշարին՝ Սամվել Տեր-Սահակյանը, Ռոբերտ Հովհաննիսյանը, Մանուել Պետրոսյանը, Հայկ Մարտիրոսյանը, Զավեն Անդրիասյանը, Արման Փաշիկյան, Տիգրան Պետրոսյանը, Շանթ Սարգսյանը, Հովհաննես Գաբուզյանը, Լևոն Բաբուջյանը, Տիգրան Հարությունյանը և Մամիկոն Ղարիբյանը: Մրցաշարերի բացման արարողությունները կկայանան փետրվարի 15-ին՝ ժամը 15։00-ին, Տ. Պետրոսյանի անվան շախմատի տանը, իսկ առաջին տուրի պարտիաները կմեկնարկեն փետրվարի 16-ին՝ ժամը 15։00-ին։

Միացեք «Հինգշաբթի» անկախ լրատվական հարթակի տելեգրամի ալիքին 👉 https://t.me/hingshabti

wp-apeth