Վերջին երկու օրերին վարակման նոր դեպքերի թիվն էականորեն ավելացել է
Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Նիկոլ Փաշինյանը: Նախքան օրակարգային հարցերի քննարկումը վարչապետն անդրադարձել է Հայաստանում կորոնավիրուսի հետ կապված իրավիճակին և նշել, որ նախորդ ամսվա ընթացքում ամեն օր գրանցվել է կորոնավիրուսի` մոտ 200-ից պակաս հաստատված դեպք՝ բացառությամբ մեկ օրվա, որ գրանցվել է 203 դեպք:
«Բայց վերջին երկու օրերին դեպքերի թիվն էականորեն ավելացել է՝ նախորդ օրը 257, երեկ 295: Ճիշտ է, հայտնաբերման տոկոսը բավականին բարձր է: Երեկ ունեցել ենք 4319 թեստ, նախորդ օրը՝ 4135, բայց, այնուամենայնիվ, միտումն անհանգստացնող է, և կարծում եմ, որ մենք մեր բոլորի և հանրության ուշադրությունը պետք է հրավիրենք այս խնդրի վրա»,-ասել է վարչապետը՝ հավելելով, որ, դա թերևս կապված է դպրոցների բացման հետ:
Առողջապահության նախարարի տեղակալ Անահիտ Ավանեսյանը տեղեկացրել է, որ թեստավորումների ընդհանուր հետազոտությունների թիվը մեծ է, այդ պատճառով էլ մեծ է բացարձակ թվով դեպքերի թիվը: «Բայց մենք նաև նկատում ենք թեստավորման մեջ տոկոսային աճ: Այսօր մոտ 7 տոկոս է կազմում, ինչը մտահոգիչ է: Մենք, մեր վերլուծությունների արդյունքում, կարծում ենք, որ այս աճը, միտումը կապված է մինչ դպրոցական շրջանի ակտիվացման և տեղաշարժի ավելի ակտիվացման հետ՝ մինչ դպրոցական առևտուր անելու, հանգստյան տներից վերադառնալու հետ: Սեպտեմբերի 15-ին բացվեցին դպրոցները, բայց մինչև դա արդեն իսկ բավական աշխուժություն էր նկատվում: Եվ առաջիկա երկու շաբաթների ընթացքում մենք նոր կտեսնենք դպրոցների բացման արդյունքում ինչ արդյունքներ ենք գրանցում: Իհարկե, արտակարգ դրության ռեժիմն ավարտվեց, բայց այն սահմանափակումները, որոնք առկա են, պետք է խստորեն պահպանել: Թվերն էլ մեզ հուշում են, որ միայն բոլոր կանոնների պահպանման արդյունքում կարող ենք զսպել աճի միտումը, և աշնան ընթացքում չունենանք թվերի կտրուկ վերելք, ինչը առողջապահական համակարգի մեծ լարում է առաջացնում և մեր աշխատանքը շատ է դժվարացնում»,-ասել է փոխնախարարը:
Նիկոլ Փաշինյանը նշել է, որ գործնականում այս պահին կորոնավիրուսի դեմ պայքարի մեկ ապացուցված գործիք ունենք, և դիմակի կրման պայմանները պետք է խստորեն պահպանվեն: «Ես ուզում եմ արձանագրել, որ մենք պետք է առավել հետևողական լինենք այս հարցում, և ոչ մի ոստիկան դիմակ չկրող ոչ մի քաղաքացու մոտով անտարբեր չպետք է անցնի»,-ասել է վարչապետը:
Կառավարության ղեկավարի խոսքով՝ անհրաժեշտ է շարունակել վարակի տարածման կանխարգելմանն ու իրազեկման աշխատանքները. «925 կորոնավիրուսից մահացած մարդ ունենք, 283 հոգի կորոնավիրուսով վարակված՝ մահացել են այլ պատճառներով: Եվ երբ տեսնում ենք, թե ինչ է տեղի ունենում այլ երկրներում, ավելի եմ համոզվում, որ պետք է սովորենք կորոնավիրուսի հետ ապրել առանց ամենախիստ սահմանափակումների: Ես համոզվում եմ, որ մենք պետք է շարունակենք գնալ այդ ճանապարահով: Բայց դա հնարավոր է միայն այն պարագայում, երբ մեր առողջապահական հիմնարկները պատրաստ լինեն սպասարկել, բուժել դրա անհրաժեշտությունն ունեցող բոլոր քաղաքացիներին: Հուլիսին, օրինակ, եզրին էինք, օրեր ենք ունեցել, երբ մեր վերակենդանացման բաժանմունքներում երկու-երեք ազատ տեղ է մնացած եղել, բայց կարողացել ենք այդ իրավիճակը հաղթահարել, և, ըստ էության, ոչ մի քաղաքացու առանց բժշկական օգնության չենք թողել»:
Նիկոլ Փաշինյանն անդրադարձել է մի վերլուծության, որի համաձայն՝ այն երկրները, որոնք առավել խիստ սահամանափակումների են գնացել և կորոնավիրուսի դեմ պայքարում լավագույն արդյունքներն են գրանցել՝ ունեն տնտեսական ամենախորը խնդիրները: «Եվ սա, իհարկե, հասկանալիորեն փոխկապակցվածության մեջ է, և մենք պետք է շատ ուշադիր լինենք դպրոցներում, փողոցներում, ամենուր, որ կարողանանք այդ խնդիրները լուծել»,-նշել է վարչապետը:
