«Ալաշկերտն»՝ առաջատար. երկրորդ տուրի ամփոփումը
Հայաստանի Պրեմիեր լիգայի ընթացիկ առաջնության երկրորդ տուրում նախատեսված հինգ խաղից կայացան երեքը: «Շիրակ» — «Արարատ», ինչպես նաև «Լոռի» — «Վան» հանդիպումները չկայացան: Ավելի վաղ «Շիրակն» ու «Արարատը» դիմել էին ՀՖՖ առաջիկա տուրի իրենց մասնակցությամբ խաղը հետաձգելու հարցով: Երևանի «Արարատում» կորոնավիրուսով վարակվածների թիվն ավելացել էր, վարակի դեպք էր գրանցվել նաև «Շիրակում»: Երեկ պարզ դարձավ, որ կրկին վարակվածներ կան «Լոռիում»: Հիշեցնենք, որ առաջին տուրում ևս մեկ խաղ չէր կայացել: «Լոռին» չէր ներկայացել «Ուրարտուի» հետ մրցավեճին, արդյունքում Հայաստանի ֆուտբոլի ֆեդերացիայի կարգապահական և էթիկայի կոմիտեն «Լոռիի» չներկայանալը համարեցին անհարգելի և տեխնիկական հաղթանակ շնորհեցին «Ուրարտուին»:
Ինչ վերաբերում է երկրորդ տուրում տեղի ունեցած խաղերին, ապա խաղային առաջին օրն «Ալաշկերտը» սեփական հարկի տակ ընդունեց փոխչեմպիոն «Նոային» և կարողացավ հաղթել նվազագույն հաշվով՝ հաղթական գոլը խփելով խաղի ավարտից րոպեներ առաջ: Եղիշե Մելիքյանի գլխավորած թիմն առաջին հաղթանակը տարավ առաջնությունում, իսկ Իգոր Պիկուշչակի սաները կրեցին առաջին պարտությունը: Հանդիպումն աչքի ընկավ տանտերերի գլխավոր մարզիչ Եղիշե Մելիքյանի մասնակցությամբ միջադեպով: վերջինս, դժգոհ մրցավարների գործողություններից, չկարողացավ զսպել էմոցիաներն ու մի քանի արտահայտություն թույլ տվեց վերջիններիս հասցեին:
Խաղային մյուս օրը կայացավ միանգամից երկու հանդիպում, երկու դեպքում էլ գրանցվեց ոչ-ոքի: Կրկին չկարողացավ հաղթանակ տանել չեմպիոն «Արարատ-Արմենիան»: Դավիդ Կամպանյայի գլխավորած թիմն այս անգամ խնդիրներ ունեցավ «Գանձասար-Կապանի» հետ և շատերի կարծիքով շատ մոտ էր պարտությանը, եթե հյուրերի խաղացողներն ավելի դիպուկ գտնվեին: Միայն հարվածների քանակով կապանցիները մի քանի անգամ գերազացեցին մրցակցին: Ի վերջո, գրանցվեց ոչ-ոքի: Սա չեմպիոնի երկրորդ անընդմեջ ոչ-ոքի էր ընթացիկ առաջնությունում, իսկ Արմեն Պետրոսյանի սաները վաստակեցին անդրանիկ միավորը:
Օրվա մյուս խաղում գոլեր չգրանցվեցին: «Փյունիկն» ու «Ուրարտուն» մրցեցին «Հանրապետականում» և բաժանվեցին խաղաղությամբ: Ճիշտ է, մինչ այդ Ալեքսանդր Գրիգորյանի գլխավորած թիմին շնորհվել էր տեխնիկական հաղթանակ, սակայն թիմը դեռ խաղ չէր անցկացրել, իսկ Արտակ Օսեյանի թիմը պարտվել էր առաջին տուրում: Կողմերը բավարարվեցին մեկական միավորով:
- Մրցաշարային աղյուսակ
N | Թիմեր | Խ | Հ | Ո | Պ | ԽԳ | ԲԳ | Մ |
---|---|---|---|---|---|---|---|---|
1. | Ալաշկերտ | 2 | 1 | 1 | 0 | 1 | 0 | 4 |
2. | Արարատ | 1 | 1 | 0 | 0 | 1 | 0 | 3 |
3. | Վան | 1 | 1 | 0 | 0 | 2 | 1 | 3 |
4. | Արարատ-Արմենիա | 2 | 0 | 2 | 0 | 1 | 1 | 2 |
5. | Շիրակ | 1 | 0 | 1 | 0 | 2 | 2 | 1 |
6. | Ուրարտու | 1 | 0 | 1 | 0 | 0 | 0 | 1 |
7. | Նոա | 2 | 0 | 1 | 1 | 2 | 3 | 1 |
8. | Գանձասար-Կապան | 2 | 0 | 1 | 1 | 2 | 3 | 1 |
9. | Փյունիկ | 2 | 0 | 1 | 1 | 0 | 1 | 1 |
10. | Լոռի ՖԱ | 0 | 0 | 0 | 0 | 0 | 0 | 0 |
Ստացվեց այնպես, որ հաջորդ տուրում նախատեսված հինգ խաղից կկայանա ընդամենը մեկը: Խոսքը «Վան» — «Փյունիկ» խաղի մասին է: Բանն այն է, որ ավելի վաղ որոշում էր կայացվել հետաձգել այն թիմերի մասնակցությամբ հանդիպումները, որոնք օրեր անց մասնակցելու են Եվրոպայի լիգայի խաղարկության որակավորման առաջին փուլին.հետաձգվել են մասնավորապես «Ուրարտու» — «Շիրակ», «Արարատ» — «Ալաշկերտ», «Նոա» — «Արարատ-Արմենիա» խաղերը: Ինչպես արդեն նշել ենք կորոնավիրուսի նոր դեպքերով պայմանավորված հետաձգվել է նաև երրորդ տուրի «Գանձասար-Կապան» — «Լոռի» մրցավեճը:
Տուր 3 | Քաղաք | Մարզադաշտ | ||||
Նոա |
–
|
Ար.-Արմ. | Երևան | |||
Արարատ |
–
|
Ալաշկերտ | Երևան | |||
Ուրարտու |
–
|
Շիրակ | Երևան | |||
28.08.20 | Վան |
–
|
Փյունիկ | Չարենցավան | Քաղաքային | 16:45 |
Գանձասար |
–
|
Լոռի | Երևան |
Առաջնության լավագույն ռմբարկուների ցուցակում երկրորդ տուրից հետո առաջատարը «Գանձասար-Կապանի» հարձակվող Գեղամ Հարությունյանն է, որը խփել է երկու գոլ: Մնացածն աչքի են ընկել մեկական անգամ:
- Ռմբարկուներ
N
|
Ֆուտբոլիստ
|
Գոլեր | |
01
|
—
|
Գեղամ Հարությունյան (Գանձասար-Կապան) | 2 |
02
|
—
|
Ուրոշ Նենադովիչ (Արարատ) | 1 |
03
|
—
|
Դավիդ Դավիդյան (Ալաշկերտ) | 1 |
04
|
—
|
Սերգեյ Վակուլենկո (Արարատ-Արմենիա) | 1 |
05
|
—
|
Արտյոմ Միքայելյան (Շիրակ) | 1 |
06
|
—
|
Արման Ասլանյան (Շիրակ) | 1 |
07
|
—
|
Միհրան Մանասյան (Վան) | 1 |
08
|
—
|
Դանու Սպետառու (Նոա) | 1 |
09
|
—
|
Էզա Կուասի Ուիլֆրեդ (Վան) | 1 |
10
|
—
|
Վլադիմիր Ազարով (Նոա) | 1 |