Փորձել են պայթեցնել Վրաստանի հայ պատգամավորի եղբոր մեքենան․ Հենզել Մկոյանը վստահ է՝ թիրախն ինքն էր
Վրաստանի ներքին գործերի նախարարությունը հետաքննություն է սկսել խորհրդարանի «Վրացական երազանք» կուսակցության մեծամասնական պատգամավորի եղբորը պատկանող մեքենայի պայթեցման փորձի առթիվ:
Ինչպես հաղորդել են Վրաստանի ՆԳՆ-ից JNEWS-ի հետ զրույցում, հետաքննությունը տարվում է Վրաստանի ՔՕ 229-րդ հոդվածի առաջին մասով, ինչը ենթադրում է պայթյուն:
Օգոստոսի 21-ին Ախալքալաքում, Սամցխե-Ջավախեթիի համալսարանի մոտակայքում, ճանապարհին փորձել են պայթեցնել Վրաստանի խորհրդարանի «Վրացական երազանքի» մեծամասնական պատգամավոր Հենզել Մկոյանի եղբոր՝ Մարտուն Մկոյանի Mersedes մակնիշի ավտոմեքենան: Պայթյունից վնասվել են Մարտուն Մկոյանի լսողական ընկալիչները:
JNEWS-ի հարցին, արդյո՞ք այսքանից հետո գործող պատգամավոր Հենզել Մկոյանը պատրաստվում է մասնակցել հոկտեմբերին Վրաստանում կայանալիք խորհրդարանական ընտրություններին, վերջինս ասել է.
«Ես չեմ ուզում, ժողովուրդն է ուզում, որ մասնակցեմ ընտրություններին: Երևի այսքան դեպքերից հետո արդեն առաջադրեմ թեկնածությունս որպես անկախ պատգամավոր: Այսօր ես տեսնում եմ, որ իմ գլխին ամեն շաբաթ մի բան բերում են»:
Նշենք, որ հոկտեմբերին կայանալիք խորհրդարանական ընտրություններին «Վրացական երազանք» կուսակցությունը Ախալքալաքի և Նինոծմինդայի շրջանից որպես մեծամասնական թեկնածու առաջադրել է Սամվել Մանուկյանին, ոչ թե Հենզել Մկոյանին: Հավելենք, որ Հենզել Մկոյանը Վրաստանի խորհրդարանի պատգամավոր է սկսած 1999 թվանակից մինչ օրս:
Jnews-ի հարցին, ինչպես է դեպքը եղել Մարտուն Մկոյանը հրաժարվել է պատասխանել՝ պատճառաբանելով, որ լավ չի լսում:
Իսկ պատգամավոր Հենզել Մկոյանն ասել է. «Ես հյուրեր ունեի, նրանց հետի էի, զանգեց եղբայրս, ասաց շատ մեծ պայթյուն է եղել իր կողքին, որից ինքը սկսել է լսելու ունակությունը կորցնել, բացի դրանից մեքենայի վրա մուր է հայտնվել, մեքենայի բոլոր 6 անվտանգության գոտիները բացվել են: Ես եկա դեպքի վայր տեսա, որ ծառի տակ ճյուղերը ջարդված են, պայթյունից ծառի տակ փոս է առաջացել: Պայթյունն այնքան ուժեղ է եղել, որ շենքերի ապրողները դուրս են եկել վախեցած, պայթյունը լսել են նույնիսկ քաղաքի կենտրոնում»:
Պատգամավորը եղբոր մեքենայի պայթյունի փորձը կապում է իր գործնեության հետ և վստահ է, որ նպատակակետը ինքն է եղել, ոչ թե եղբարը:
«Սա մեր ընտանիքի վրա մտածված է կատարվում: Երեկ երեկոյան եղբորս մեքենայով ես իջել եմ Հէկ, երևի սա էլ են հաշվի առել: Դուք երեևի իմ ֆեյսբուքյան էջում տեսել եք, որ հուլիսի 20-ին ինձ զանգել և սպառնացել են, որ տնից դուրս չգամ, խելոք նստեմ տանը, ընտրություններին չմասնակցեմ, թե չէ իրենք ինձնից ամենաթանկագինը կխլեն: Երկրորդ անգամ ամսի 24-ին զանգել են վայբերով, ռուսական համարով, ասել են՝ անպայման պետք է մեծ գումար ուղարկեմ, եթե՝ ոչ, ապա նրանք ինձ կսպանեն: Նա ասաց, որ 15 տարի նստել է և պատրաստ է ևս 20 տարի նստել, եթե ես չկատարեմ պահանջը: Ես դիմեզի գլխավոր դատախազություն որպես պատգամավոր, որ ինձ վախեցնում են, դիմեցի պարոն Շոթաձեին, նա իմ դիմումն ուղարկել է Ախալցիխեի ոստիկանություն: Այսօր եղավ այն, ինչը սպասելի էր, այսինքն՝ այդ մարդիկ պատահական մարդիկ չեն: Մարտի 26-ին իմ վրա կատարվեց մահափորձ, տեսանյութերը կան, այսօր հասավ այն վիճակին, որ իմ ընտանիքի անդամները, իմ երեխաները, իմ կինը՝ բոլորի հոգեբանությունը խառնվել է, նրանք գիշերը չեն քնում, դեղորյաք են խմում: Այսօր մենք անպաշտպան ենք, որովհետև դեպքերը լինում են, բայց ոչ ոք ուշադրություն չի դարձնում: Ես կարծում եմ, որ հիմնական նպատակակետը ես եմ եղել, ոչ թե եղբայրս», – ասել է Հենզել Մկոյանը:
Հիշեցնենք, որ օգոստոսի 10-ին պատգամավոր Հենզել Մկոյանի փաստաբանը հայտարարել էր, որ Մկոյանին շանտաժի են ենթարկում, սպառնում սպանել, և նրանից 5 մլն դոլար շորթելու փորձ է եղել: Արդեն օգոստոսի 12-ին Վրաստանի ներքին գործերի նախարարության հայտարարություն տարածեց, որ Սամցխե-Ջավախքի ոստիկանությունում հետաքննությունն իրականացվում է Քրեական օրենսգրքի 181-րդ հոդվածի 2-րդ մասի «Դ» ենթակետով, որը ենթադրում է շորթում՝ խոշոր գումար ստանալու նպատակով, որը ուղեկցվում է զոհի կամ նրա մերձավոր ազգականի նկատմամբ բռնության սպառնալիքով, նրանց ունեցվածքի ոչնչացմամբ կամ վնասմամբ, լուրերի տարածմամբ կամ այլ տեղեկությունների տարածմամբ, ինչը կարող է էականորեն խախտել նրանց իրավունքները: