Անելիքներն ու խնդիրները Շիրակի մարզի մի շարք համայնքներում. Խմելու ջրից մինչև ասֆալտապատում
Շիրակի մարզպետ Տիգրան Պետրոսյանը մարզպետարանի ոլորտային պատասխանատուների հետ այցելել է Արթիկի նախկին տարածաշրջանի մի շարք համայնքներ: Հոռոմ համայնքում համայնքապետարանի պատասխանատուների և ավագանու անդամների հետ հանդիպման ժամանակ քննարկվել են համայնքում իրականացվող ծրագրերի ընթացքին, առաջիկա անելիքներին և առկա խնդիրներին վերաբերող հարցեր։
Հոռոմում վերանորոգվում է Սբ․ Հռիփսիմե եկեղեցին, Շիրակի մարզպետարանը դեռ 2017-ին պատվիրել է եկեղեցու վերականգնման աշխատանքների նախագծա-նախահաշվային փաստաթղթերը։ «Շինարար 97» կազմակերպությունը 2018 թվականին իրականացրել է շուրջ 12 մլն դրամի աշխատանք, այս տարի դեռ աշխատանքներ չեն մեկնարկել։ Մեկնարկել են նաև համայնքի ոռոգման ներքին ցանցի անցկացման աշխատանքները։ 89 մլն 476 հազար դրամ արժողությամբ ծրագիրն իրականացվում է «Գյուղական տարածքների տնտեսական ծրագրերի իրականացման գրասենյակ» -ի կողմից, համայնքն իրականացնում է հինգ տոկոս համաֆինանսավորում։ Անցկացվելու է մոտ 3 կմ ոռոգման ցանց։
Շիրակի մարզպետն այցելել է նաև Վարդաքար և Նոր Կյանք համայնքներ։ Տիգրան Պետրոսյանը կարևորել է համայնք — պետություն համագործակցության արդյունքում իրականացվող ծրագրերը՝ նշելով, որ սուբվենցիոն ծրագրերով հնարավոր կլինի քայլ առ քայլ լուծել տարիներ շարունակ կուտակված հիմնահարցերը։ Նոր Կյանքում 2020 թվականի սուբվենցիոն ծրագրի շրջանակներում կխճապատվի և տուֆ քարով կսալապատվի ներհամայնքային թվով 7 փողոց։ Ծրագրի ընդհանուր արժեքը 32 մլն 53 հազար դրամ է, պետությունը կհատկացնի գումարի 55%-ը, համայնքը՝ 45%-ը:
Մարզպետը զրուցել է համայնքների բնակիչների հետ, լսել նրանց մտահոգությունները, հորդորել պահպանել հակահամաճարակային անվտանգության կանոնները, անդրադարձ է կատարվել նաև առաջիկա բերքահավաքին, ինչպես նաև պետության կողմից ՀՀ-ում աշնանացան ցորենի արտադրության խթանման պետական աջակցության ծրագրին և մարզի գյուղացիական տնտեսությունների այդ ծրագրից օգտվելու հնարավորություններին։
Մարզային իշխանության ներկայացուցիչներն այցելել են Փանիկ համայնք, հանդիպել համայնքաբնակներին, համայնքապետարանի պատասխանատուներին, ավագանու անդամներին։ Համայնքի բնակիչները կարևորել են ոռոգման և խմելու ջրի խնդրի լուծումը։ Այստեղ 2020 թվականի սուբվենցիոն ծրագրի շրջանակներում իրականացվում են համայնքապետարանի շենքի և տանիքի վերանորոգման, ինչպես նաև ջեռուցման համակարգի անցկացման աշխատանքներ։ 27 մլն 525 հազար դրամ արժողությամբ ծրագրի 40 տոկոսը հատկացնելու է պետությունը, մնացածը համայնքի ներդրումն է։ Աշխատանքներն արդեն ընթացքի մեջ են։ «Երբ համայնքներում տեսնում ենք աշխատանք, տեսնում ենք հոգատարություն և սրտացավություն, վստահորեն կարելի է ասել, որ ցանկացած խնդրի լուծում հաղթահարելի է, որովհետև պետությունը և մարզային իշխանություններն ունեն հաստատակամություն կանգնելու համայնքների կողքին և համատեղ աշխատանքով լուծելու կուտակված խնդիրները»,- հանդիպման ժամանակ նշել է Տիգրան Պետրոսյանը։
Շիրակի մարզպետն այցելել է նաև Փանիկի Պետրոս Նահապետյանի անվան պատմության թանգարան, որտեղ պահպանվում են գյուղատնտեսական ու հացահատիկի վերամշակման գործիքներ, ինչպես նաև հացի տեսակներ, որոնք տարածված են այս բնակավայրերում՝ բոքոն, փառնիկ, թափթափա, գարեհաց, քարտիկա, ծակուլիկ և այլն:
Մեղրաշեն համայնքում Տիգրան Պետրոսյանը հետևել է համայնքի հանդիսությունների սրահի կառուցման աշխատանքների ընթացքին։ Դեռ 2019-ից մեկնարկած և այս տարի շարունակվող սուբվենցիոն ծրագրի ընդհանուր արժեքը մոտ 60 մլն դրամ է, պետությունը տրամադրել է գումարի 40 տոկոսը։
Ընթացքի մեջ են նաև համայնքի դպրոցի մարզադահլիճի վերանորոգման աշխատանքները։ «Շեն» բարեգործական հիմնադրամի, «Վարձատրվող հասարակական աշխատանքներ» ծրագրի և համայնքի համատեղ ջանքերով մարզադահլիճից զատ կնորոգվեն հանդերձարանները, մարզական գույք ձեռք կբերվի, կանցկացվի դպրոցի կոյուղին։