Մնաց երեք տուր՝ երեք եզրափակիչ. 25-րդ տուրի ամփոփումն ու «Շիրակի» խաղացանկը
Բարձրագույն խմբի ընթացիկ առաջնության 25-րդ տուրից հետո չեմպիոնական մրցավազքն ավելի սրվեց: «Արարատ-Արմենիան» երկրորդ անընդմեջ պարտությունը կրեց՝ Վանաձորում պարտվելով տեղի «Լոռիին»: Նախորդ տուրում Վարդան Մինասյանի գլխավորած թիմը Գյումրիում պարտվել էր «Շիրակին», իսկ դրանից առաջ ոչ-ոքի խաղացել «Նոայի» հետ: Վերջին երեք տուրում հնարավոր 9 միավորից չեմպիոնը վաստակել է ընդամենը 1 միավոր և թույլ տվել «Շիրակին» միավորներով հավասարվել իրեն և լրացուցիչ արդյունքներով դառնալ առաջատար: Երկու թիմն էլ կայացած 25 տուրից հետո վաստակել են 45-ական միավոր: Ընթացիկ մրցաշրջանում հանդիպել են չորս անգամ՝ երկու անգամ հաղթել է «Շիրակը», մեկ անգամ «Արարատ-Արմենիան», մեկ խաղ ավարտվել է ոչ-ոքի: «Շիրակը» հաշվետու տուրի իր խաղում խնդիրներ չունեցավ և 4:1 հաշվով հաղթեց «Արարատին», որն ակտիվում ունի 33 միավոր և եզրափակում է լավագույն վեցնյակը:
Չեմպիոնական մրցավազքին միացավ նաև «Նոան», որ արտագնա կարևոր մրցավեճում կարողացավ հաղթանակ կորզել «Ալաշկերտից» և, շրջանցելով վերջինիս մրցաշարային աղյուսակում, վաստակած 42 միավորով երրորդ տեղում է: 40 միավոր է վաստակել «Ալաշկերտը», որը զբաղեցնում է չորրորդ հորիզոնականը: «Լոռիին» նույնպես պետք չէ հաշվից հանել: Վանաձորի թիմն առաջատարներից ետ է մնում ընդամենը 6 միավորով, սակայն առաջնության ավարտին մնացել է ընդամենը երեք տուր:
- Մրցաշարային աղյուսակ
| N | Թիմեր | Խ | Հ | Ո | Պ | ԽԳ | ԲԳ | Մ |
|---|---|---|---|---|---|---|---|---|
| 1. | Շիրակ | 25 | 13 | 6 | 6 | 38 | 22 | 45 |
| 2. | Արարատ-Արմենիա | 25 | 13 | 6 | 6 | 42 | 23 | 45 |
| 3. | Նոա | 25 | 12 | 6 | 7 | 32 | 25 | 42 |
| 4. | Ալաշկերտ | 25 | 12 | 4 | 9 | 42 | 28 | 40 |
| 5. | Լոռի ՖԱ | 25 | 10 | 9 | 6 | 34 | 28 | 39 |
| 6. | Արարատ | 25 | 9 | 6 | 10 | 31 | 34 | 33 |
Հայաստանի ֆուտբոլի ֆեդերացիան արդեն հաստատել է առաջիկա երկու տուրի խաղացանկը: «Շիրակն» առաջիկա տուրում սեփական դաշտում ընդունելու է «Լոռիին» մարզային դերբիի շրջանակներում, որի հետ հանդիպումները բավականին բարդ են ստացվում գյումրեցիների համար: «Արարատ-Արմենիան» ուժերը չափելու է «Ալաշկերտի» հետ, իսկ ահա «Նոնան» ընդունելու է «Արարատին»: Ստացվում է՝ սկսած 26-րդ տուրից կատաղի պայքար է ընթանալու ցանկացած միավորի համար: «Լոռիի» հետ հանդիպումից հետո շիրակցիներն արտագնա մրցավեճում հյուր են գնալու «Նոային», իսկ առաջնության վերջին տուրում ընդունելու են «Ալաշկերտին»: Վերջին տուրում «Արարատ-Արմենիան» մրցելու է «Նոայի» հետ, իսկ «Լոռին» խաղալու է «Արարատի» հետ: 28-րդ տուրի խաղացանկը ֆեդերացիան դեռ չի հաստատել:
| Դաշտի տերը | Հյուրը | Քաղաքը | Մարզադաշտը | Օրը | Ժամը | |
| 26 տուր | ||||||
| «Շիրակ» | «Լոռի ՖԱ» | Գյումրի | քաղաքային | 02/07/2020 | 17:30 | |
| «Ար.-Արմենիա» | «Ալաշկերտ» | Երևան | Ավան | 02/07/2020 | 20։00 | |
| «Նոա» | «Արարատ» | Երևան | «Նաիրի» | 02/07/2020 | 18:00 | |
| «Փյունիկ» | «Գանձսաար» | Երևան | Ավան | 01/07/2020 | 19։00 | |
| 27 տուր | ||||||
| «Նոա» | «Շիրակ» | Երևան | «Նաիրի» | 06/07/2020 | 18։00 | |
| «Արարատ» | «Ար.-Արմենիա» | Երևան | Ավան | 06/07/2020 | 20:00 | |
| «Ալաշկերտ» | «Լոռի ՖԱ» | Երևան | «Նաիրի» | 07/07/2020 | 18։00 | |
Բարձրագույն խմբի ընթացիկ առաջնության 25-րդ տուրում «Շիրակի» հարձակվող Մորի Կոնեն գրավեց Երևանի «Արարատի» դարպասը 55-րդ և 84-րդ րոպեներին՝ առաջ մղելով ու կամային հաղթանակ պարգևելով իր թիմին (4:1): Աֆրիկացի լեգեոների 20-րդ և 21-րդ գոլերն էին Հայաստանի ընթացիկ առաջնությունում: Հավելենք, որ Կոնեն գլխավորում է առաջնության լավագույն ռմբարկուների ցուցակը: Նա արդեն 10 գոլ ավելի է խփել, քան երկրորդ տեղում գտնվող Վանաձորի «Լոռիի» հարձակվող Ջոնել Դեսիրեն:
Լավագույն ռմբարկուները
|
N
|
Ֆուտբոլիստ
|
Գոլ | |
|
01
|
—
|
Մորի Կոնե (Շիրակ) | 21 |
|
02
|
—
|
Ջոնել Դեսիրե (Լոռի ՖԱ) | 11 |
|
03
|
—
|
Գուստավո Մարմենտինի Դոս Սանթոս (Ալաշկերտ) | 10 |
|
04
|
—
|
Ալեքսանդար Գլիշիչ (Ալաշկերտ) | 9 |
|
05
|
—
|
Մաքսիմ Մայրովիչ (Նոա) | 9 |
|
06
|
—
|
Դենիս Մահմուդով (Փյունիկ) | 9 |
|
07
|
—
|
Մաիլսոն Լիմա Դուարտե Լոպես (Արարատ-Արմենիա) | 8 |
|
08
|
—
|
Եվգենի Կոբզար (ՈՒրարտու) | 7 |
|
09
|
—
|
Ռամազան Իսաև (Արարատ) | 7 |
|
10
|
—
|
Տիագո Գալվաո Դա Սիլվա (Ալաշկերտ) | 6 |
